مذكرات بدوي

[بدوي]

سلام....
طبعاً انا ماراح اكتب مذكراتي او يومياتي.... لاني مرة كتبتها في واحد من المنتديات... وكتبت كل شيء يصادفني في يومي.... ولكني تماديت (في نشر اشياء خاصة جداً) فأغلقوا الموضوع بحجة انه غير مفيد.... ولكن بعد فترة اضافوا قسم خاص للمذكرات للي يبي يكتب مذكراته من الاعضاء.... (طبعاً الفكرة فكرتي.... وانا الوحيد اللي مااكتب)..... وقبل لا اكتب الموضوع هنا.... فكرت اني اقول لابو يعقوب او الاخ احمد عن الفكرة..... وانهم يضيفون قسم للي يبي يكتب مذكراته او مدونة خاصة فيه.... ولكن قلت خلني اكون مثال حي..... وانا ماراح اكتب مذكراتي بمعنى الكلمة.... ولكني اكتب مايختلج في نفسي (طالبكم طلبة تغضون الطرف عن كلمة يختلج وتخلون الموضوع يعدي على خير)...... المهم... اني تجيني افكار وهواجيس عن مايمر بي في يومي.... واللي راح اكتبه لكم هنا هو هذه الهواجيس.... تدرون ليش؟؟.... لاني اشوف انها مسلية اكثر.....
وفي الختام..... راح اقتبس كلمة يقولها واحد من الاعضاء مااذكر من بالظبط
دمتم بالود

[Ahmad]

و نحن بالانتظار.

بس صعبة نفتح قسم كامل.

[بدوي]

حياك الله اخوي احمد.... وانا كنت اقترح والرأي اولأً واخيراً رأيكم
الحاصل اني كنت افكر اليوم في الفرق بين العضو المثقف والعضو السطحي..... وطلعت بعدة آراء..... انتهيت فيها الى ان الاصل في العضو بالعادة يكون سطحي (يمكن يكون في حياته مثقف وتفكيره عميق.... لكنه في النت جاي علشان يتسلى وماراح يجتهد في المنتدى)..... ومجرد ان العضو ينزل مواضيع مهمة ولها قيمة مب دليل على درجة ثقافته..... ولكن الدليل يكون فيما يطرحه من آراء في مشاركاته في مواضيع الآخرين (في هذه اللحظة بالذات اخوي قاعد يطول على اغنية الاماكن (بصوت فنان اماراتي).... وانا اندمجت في الاغنية وانقطع حبل الافكار عندي!!)
وفي شيء ثاني لفت انتباهي...... احد منكم شاف توقيع عضو ثاني وقال في نفسه هالعضو يقصدني؟؟

[حروف]

مذكرات!!...

تعرف إنه في ناس يرفعون قضايا ويطلبون تعويض عشان حد تعدى على خصوصيتهم..وقرأ مذكراتهم..

وحنّا هنا بالمنتدى تجينا مذكرات على طبق من فضة..صحيح دنيا غريبة..

أنا أحيي شجاعتك..لكني بنفس الوقت استصعب إقدامك على هالخطوة..لأن ميزة المذكرات بخصوصيتها..

عالعموم هذي حريتك الشخصية ..وعلى مايبدو لي إنك حاب توصل شي بشكل مبتكر..لذا سنتابع بمشيئة الله..

والله تعالى الموفق,,

[ذبحني الهـم]

شي حلو ويديد ومبتكر ..


استمر واحنا بنتابعك :good2:

[بدوي]

( ولكني انظر للجانب الممتليء من الاناء)..... "وش تقول؟!!!"..... (اقصد اذا عطيتني قلاص (كوب) فيه ماي للنص فانا ماقول ليش عطيتني الماي ناقص...... اقولك شكراً لانك عطيتني مايسد حاجتي من الماي)..... "بايخه!!".... (وش البايخه؟؟!!).... "هالنكته اللي قلتها الحين!!"..... كان المفروض اني اسكت (وفي الواقع هذا اللي سويته)..... بس اللي اقصده بيني وبينكم اني اشوف الجانب الايجابي والمضيء من الاشياء.... ومهما كان الشيء سيء فأني احاول استخلاص شيء مفيد بالنسبة لي..... هالحوار اللي فوق كان بين وبين واحد من الشباب (طالع من المدرسه قبل تسع سنوات من صف سادس وللحين قاعد في البيت لا شغل ولا مشغله.... اللهم الا الشات.... )
هالكلام قلته يوم شفت متابعتكم لهالموضوع..... فأنا قلت اني متابعتكم بتشكل لي ظغط.... بس اني ماراح افكر بهالطريقة.... ولكن متابعتكم لي بتخليني احاول اكون مبدع.... واجيب اللي يرضيكم دايماً
واحب الفت انتباهكم..... الى ان هالمذكرات ماراح اكتب فيها كل شيء..... (لان هالشيء راح يشكل مخالفة لقوانين المنتدى.... لان حياتي مب مثالية وراح تكون فيها اشياء مايجوز نشرها)
طيب انا اقولكم وش سالفتي..... انا طالع من بيت اخوي قبل شوي ونفسي عند خشمي.... لان فريقي اللي اشجعه (ريال مدريد) خسروا..... وجيت وقعدت على النت وانا في بالي اني اكمل قصة (عندما يأتي المساء)..... وللمعلومية فكل ماكتبته للحين فيها تم نشره سابقاً في منتديات اخرى..... بس اللي راح يجي فأني اكتبه مباشره وانشره..... وقلت قبل لا اكملها خلني امر على المشاركات الثانية..... وطبعاً استمعت لاغنية (صوتك يناديني)... وسولفت مع انسان تشرفني معرفته في المسنجر..... وجا في بالي اكتب خاطره.... بس بصراحة ماصارت خاطره.... فمستواها مايؤهلها انها تكون خاطره..... وترددت في نشرها عندكم.... (وانا اصلاً متوهق في قصيدة جعفرة قلبي)..... تبون تضحكون؟؟ تفضلوا هذه ما ادعيت في لحظة من اللحظات انها خاطرة!! :
حبيبتي.....
أتذكرين؟؟؟
تذكرين الحب؟
تذكرين الود؟؟
تذكرين الغرام؟؟؟
تذكرين الاماكن؟
تذكرين القمر؟
تذكرين البحر؟
تذكرين العطر؟
تذكرين الحياه والكافيه الروماني؟؟
تذكرين ماكدونالز والحجاج المقرونه؟
والعيون اللي انرسم فيها خيالي؟
تذكرين الساعة ثمان؟
تذكرين ليلة خميس؟
تذكرين الحظ التعيس؟
حبيبتي..... تدرين ليش اسأل؟
لاني ببساطه.....
مانسيت..... "هل عندك شك؟؟"
لا يااجمل واحلى امرأة في الدنيا....
للحين اذكر كل شيء
وللحين اردد (الاماكن اللي مريت انت فيها..... عايشه بروحي وابيها.... بس لكن مالقيتك..... جيت قبل العطر يبرد.... قبل حتى يذوب في صمت الكلام ..... واحتريتك..... كنت اظن الريح جابت عطرك يسلم علي..... وكنت اظن الشوق جابك تجلس بجنبي شوي.... كنت اظن وكنت اظن.... وخاب ظني.... ومابقى في العمر شيء.... واحتريتك)


شفتوا الذكاء..... (مغروووووووووووووووووووووووووووووووووووووووور).... . بس ماراح اقولكم وين الذكاء....
تصبحون على خير.... اما انا باروح احاول اكمل (عندما يأتي المساء).... على الطاري.... هالاسم (عندما يأتي المساء).... مب غريب علي... يعني انا متأكد اني مب مخترعه.... اما عنوان كتاب... او قصه.... او ديوان.... او اغنية.... ياليت احد يفيدنا ويقول لنا اذا تذكره بشيء.... وشاكر لكم

[بدوي]

ياسلاااااااااااااااااااااااااااااااام
الجو روووووووووووووووووووووووووووووووووووووووووووو عه
مطر وغيم وخير وونااااااااااااااااااااااااااااااااااااااااااااااا اااااسه
بس اقولكم شيء.... اليوم طرت علي سالفه حزينه مدري وش اللي جابها على بالي..... قبل اسبوعين توفي ولد اخوي (اسمه صالح.... وعمره 7سنوات).... هالولد فيه مرض نادر.... فجسمه ماينمو... او مدري فيه اعاقه.... المهم انه مقعد ومايتحرك.... وهالصبي مشاءالله عليه.... عقله اكبر من سنه... وذكي جداً.... قبل وفاته بيوم واحد.... مريت عليه وسلمت عليه.... قالي عمي فرج انا ابيك تقرا لي قصتك الجديدة (عندما يأتي المساء) وكانت القصة في بدايتها.... ومع اني مشغول... قلت انت تأمر امر.... وقعدت اقرا له القصة.... وكان مركز ومنتبه للقصه.... وانا قعدت اقرا.... ويوم وصلت للجزء اللي فيه اغنية طلال مداح (وترحل).... لاحظت دموعه على خده.... انا هنا جاني حزن كبيييييييييييييييييييييييير.... وماقدرت اكتم دموعي... فما قدرت اواصل القراءه..... واعتذرت بشغلي ورحت ودموعي على خدي.... لاني احب هالصبي اكثر من نفسي.... واتأثر منه... وماخلاني شعوري ذاك افكر في مدى تمتعه بذكاء وعقل كبير.... ولاكيف يفهم هالقصة ويدرك ماتحتويه من معاني وهو بهالسن..... المهم انه بعد ماتوفى جاني شعور لايوصف من الحزن والاسى والالم.... وقعدت بيني وبين نفسي الوم روحي على اني سببت له ذاك الشعور بالحزن واني تسببت في بكاءه..... وندمت على اني كتبت القصه من اساسه..... وكلما ذكرت ذيك السالفه يجيني شعور بالاكتئاب.....
الله يرحمك ياصالح

[Ahmad]

عظم الله أجرك أخوي.

[حروف]

الله يرحمه..ويجعل مثواه الجنة..

[حروف]

عندما يأتي المساء.. أغنية قديمة لمحمدعبدالوهاب

[انسانه]

الله يرحمة وانشاء الله يا رب يكون شفيع لاهله يوم القيامة

[Black Rose]

مرحبا أخي بدوي

عظم الله أجرك .. وجعله الله شفيعلاً لأهله يوم القيامة


موضوعك كتير حلو ...

الله يوفقك

[الجغرافي]

عظم الله أجرك

والله يرحمه..
ويجعل مثواه الجنة..

[بدوي]

احمد... حروف.... انسانه.... بلاك روز.... الجغرافي..... جزاكم الله خير
حروف.... بلاك روز.... شكراً

[بدوي]

اليوم.... مريت على هالمنتدى الراقي بكل مافي الكلمة من معنى..... فانا ما اجامل.... (ومن حقكم ماتصدقوني.... بس مافي شيء يجبرني على المجاملة)..... فانا كنت عضو سابق في هالمنتدى... وكنت مشاغب لدرجة لاتطاق.... وعاملوني ماشاء الله بإحترافيه.... وكنت اشوف اشياء ماتعجبني.... وكنت اتكلم عنها.... وكانت الادارة تناقشني بديمقراطيه.... وبعدين طلعت من المنتدى (لظروف خاصة... ماتمت للمنتدى واهله بصلة).... والعالم الله اني رحت وشفت منتديات ثانية.... وشاركت وياهم.... وكانت عندهم حريه زائفة وفساد.... ولكن التعامل بطريقة منتدى الجامعة... ورقي هالمنتدى ماشفت.... واللي آثار اعجابي وذهولي هو الاخ احمد.... فهو مايخلي شاردة ولاواردة الا يتابعها... ويحاول جهده ارضاء الجميع.... ولايسعني في هالموقف الا اني ارفع له القبعه واقول.... واصل اخوي احمد.... وحنا معك... وكلنا ثقة فيك
.... في موقف وصلني لحدي اليوم.... وانا طالع من بيتنا رايح لصلاة الجمعه.... تفاجأت ان فيه شلة بتان مسكرين الشارع وقاعدين يحفرون..... (لعنبو غيرهم مانخلص من حفرة الا تطلع لنا الثانية!!).... بصراحة شكيت ان البتان ناويين يخربون البلد..... (ما اكن للشعب الباكستاني الا كل مودة واحترام... هالكلام اقوله من قبيل المزاح....)
دمتم بالود

[ذبحني الهـم]

عور قلبي صالح يوم يقولك اقر وبكى الله يرحمه ويغمد روح الجنه ..:cry:

واللي آثار اعجابي وذهولي هو الاخ احمد.... فهو مايخلي شاردة ولاواردة الا يتابعها... ويحاول جهده ارضاء الجميع....

الله يعطيه العافيه على المجهود اللي يبذله ..وعساه ع القوة

بصراحة شكيت ان البتان ناويين يخربون البلد.....


هههههههههههههههههههههههههههههههههههههههههههههههههه هه حلووووة ضحكتني والله ..



الله يعطيك الف عافيه يا بدوي
يالله واصل نتظر ابداعك

[باميا]

على الطاري.... هالاسم (عندما يأتي المساء).... مب غريب علي... يعني انا متأكد اني مب مخترعه.... اما عنوان كتاب... او قصه.... او ديوان.... او اغنية.... ياليت احد يفيدنا ويقول لنا اذا تذكره بشيء.... وشاكر لكم
عندما يأتي المساء.. أغنية قديمة لمحمدعبدالوهاب
:cus2: من متى؟ أصلاً هي:
.... او اغنية....
عن الحصان اللي في إفتح يا سمسم:
"و عندما يأتي المساء ينحني .... إلخ"
لكن..
7
7
7
(لعنبو غيرهم مانخلص من حفرة الا تطلع لنا الثانية!!)....
:a43: تهقون.. كلمة " لعنبو + عنبوه + العيــــــــنبوه " من اللعن؟

بس اللي اقصده بيني وبينكم اني اشوف الجانب الايجابي والمضيء من الاشياء.... ومهما كان الشيء... فأني احاول استخلاص شيء مفيد بالنسبة لي.....
:good2:

[بدوي]

اشكرج ذبحني الهم.....
باميا.... حياج الله على هالمرور الجميل..... بس فعلاً..... اغنية (عندما يأتي المساء)... اغنية قديمة لمحمد عبد الوهاب.... سمعتها امس
اما كلمة لعنبو..... فما ادري اذا يقصد بها في الاصل اللعن.... بس الكلمة بما جرى عليه العرف في استخدامها.... وحنا الحين مانستخدمها للعن.... ولكنها كلمة هزلية..... تقال للشكوى من ظرف او موقف

[بريق الشوق]

عظم الله اجرك.. والله يرحمه ويسكنه الجنة انشالله

[بدوي]

اشكرج على مرورج اختي بريق الشوق.... وجزاج الله خير
ـــــــــــــــــــــــــــــــــــــــ
احد منكم كره احد في النت؟؟؟ او صارت بينه وبينه عداوة؟؟
عني .... فانا ياما صارت لي عداوات... وياما كرهوني ناس.... بس انا ماكرهت احد... ولله الحمد..... اللي حصل... ان في عضو يكرهني بشدة... (يعني انا عمى عينه).... وانا شفته على الطبيعه... والصراحه... سألت نفسي... ليش يكرهني؟؟.... هالانسان اللي شكله حبوب... مب مثل ماهو مصور نفسه في النت...... وكان ودي اجيه واقوله ان ذاك الرجال.... بس خفت لايسوي لي فضايح...... وبصراحه.... ندمت على كل لحظة كرهني فيها!!!

[حروف]

أخ بدوي مدري إنت شخص وإلا أشخاص يتنازعون إنسان واحد..اللي قدرت أكون فكرة عنه إنك مبدع وذكي الله يقويك وإن شاء الله نشوف المزيد من إبداعاتك..
تميزك في اختلافك وتجددك في كل موضوع.. والله تعالى الموفق

[بدوي]

حياج الله اخت حروف....
ورداً على كلامج اللي اتمنى انه يكون مدح واشكرج عليه.... بغيت اقولج اني لا شخص ولا اشخاص.... انا انسان (بدوي) مثلي مثل اي عضو ثاني في المنتدى..... واشكرج على كلامج...... والله يوفق الجميع انشاء الله

[حروف]

لا أكيد ماقصد فيها ذم أو شي آخر..بإنتظار الجديد

[بدوي]

اشكرج على مرورج اختي حروف...
....................
انا الحين واقف بالمقلوب.... يعني راسي على الارض ورجولي فوق (لاني شاركت في موضوع جدي في واحد من المنتديات... وفي رد استفزني..... وانا ارد عليه.... فسويت هالحركه علشان ماخذ الموضوع بجديه اكبر من اللازم وبعد علشان اهدي من حدة الافكار اللي تهاجمني بشراسه.... والاهم اني مرتاح بعض الشيء.... وانا طبعاً مب اللي اكتب الحين.... اللي يكتب اخوي الصغير.... وهو يقول اني متخذ الوضعيه هذي علشان افهم وجهة النظر الاخرى!!)
اليوم رحت للجامعه..... وفي الطريق مريت على المقبرة..... وتذكرت اني كنت امر من هنا يومياً .... وتذكرت يوم اخوي سألني ليش نقصر على صوت المسجل اذا مرينا من هنا وهل هو حرام ان نسمع الاغاني بالقرب من المقبرة... ورديت عليه رد منطقي.... قلت نقصر على المسجل علشان نقرأ الدعاء...... وبعدين جيت الدوار المايل (عقال الشمري)..... ولقيت كالعادة زحمه... ومع ذلك الطريق نصفه مسكر..... (الله يعين اللي يروحون للجامعه صباح)...... وتذكرت الطريق البديل اللي كنت اتخذه للهروب من الزحمه ...... وهذا الطريق يصلح لسكان المنطقه الجنوبية (الريان ومعيذر والسيليه والمره والعزيزيه).... حيث اني اروح لدوار الوجبه عن طريق الريان.... وبعدين اروح باتجاه الدوار المايل..... واذا جيت الدوار اللي قبل الدوار المايل آخذه يسار.... واروح سيده.... ويلف الطريق لين امر على ملعب الغرافه واجي الدوار الصغي اللي بعده على طول واخذه يمين واول دوار يجيني بعد كذا اخذه يسار.... واتجه للجامعه.....
في الطريق اتصل فيني واحد من اخواني اللي اكبر مني.... وسألني عن قصة (عندما يأتي المساء).... وقلت له عنها (في الواقع هالانسان يدور للاخطاء.... واعتبره ناقد ساخر)...... دخلت الجامعه.... مشيت مع الطريق الملتوي (كنت اقول ان الجامعه مسوينه بهالشكل علشان يقللون من عدد الطلاب!!)..... مريت على مواقف الفقارى عن يميني.... السيارات الموجوده ماتوحي ان اهلها فقارى....... جيت التسجيل والقبول..... وكالعاده .... خمس موظفين قاعدين يسولفون وواحد يستقبل الطلاب.... مااهتميت بهالموقف لانه ماعاد يمسني ولاني اكتفيت من هموم الجامعه.... استفسرت عن الافادة.... رحت فوق.... لقيت واحد من الشباب متخرج معي.... خذت افادتي (اول شعور جاني يوم خذتها اني بديت اصدق فعلاً اني تخرجت)..... طلعت مع نفس الطريق الملتوي.... مريت على قاعه ابن خلدون (تذكرت في هذه اللحظه اغنية الاماكن)...... وشفت واحد من الشباب اللي اعرفه (وهو من المعذبين في الارض.... وكنت زميل سابق له في الهم والاسى)...... سلمت عليه من بعيد... وعشت معاناته لدقائق..... وفي تلك الاثناء بديت اسمع صوت بو نوره على الراديو... وكان يمول.... وبعدها غنى (عل ماباس ياللي تشتكي حب غالي.... منوته شوف خلٍ مايدور بديله).... وعشت جو الاغنيه ... ومانتبهت الا دموعي على خدي.... (مافيها شيء.... يقولون انه شيء صحي ان الانسان يبكي بعض الاحيان)..... رحت للبيت.... مريت على الدكان الايراني.... خذت منه غرض ثمنه الاصلي 5 ريال.... وهو حاط سعره 20 ريال قلت له باعطيك عشره.... اصر على 15 ريال.... عطيته عشره وقلت له الخمسه بعدين.... رفع نظره للسما... وقال الله يعطيك انشاء الله.... ابتسمت وغادرت المكان..... (كان فيه احتمال ان نيته شينه... وانه يدعي علي..... بس وش فيها اذا انا كان نيتي زينه... هذا يخليني مستانس بيني وبين نفسي.... وبعدين اذا تعمدت اخلي الواحد يقص علي وانا ادري.... اعتبرها صدقه مني.... لانه يشعر انه ذكي.... وهالشعور يخليه يستانس.... فمادمت مااخسر شيء ليش احرمه من هالاناسه؟؟